Ceisir sicrhau bod yr addysg a ddarperir yn hybu datblygiad moesol, diwylliannol, meddyliol a chorfforol pob disgybl a bod natur y cwricwlwm cyflawn yn wahaniaethol, eang a chytbwys. I ymateb â'r gofynion hyn bydd trefniadaeth y dosbarth yn hyblyg; weithiau darperir gwaith ar sail oedran plant, dro arall bydd y plant o ystod oedran, sy'n rhychwantu mwy nag un blwyddyn ysgol yn cydweithio ar yr un dasg. Dysgir y plant fel uned ddosbarth fydd o dan ofal un athrawes/athro sefydlog.

Yn ôl awgrym Cyngor Cwricwlwm Cymru cynllunir y cwricwlwm ar sail wyth agwedd ar ddysgu gan gynnwys y pynciau craidd a sylfaen. Nodir cyfraniad y meysydd hyn mewn dull systematig yng nghofnodion yr athro/athrawes a'r gweithgareddau i blant yn draws ddisgyblaethol drwy ddilyn themâu penodol.

Amcanion Cyffredinol

Mae Awdurdod Addysg Gwynedd yn gweithredu polisi dwyieithog trwy holl ysgolion Gwynedd ac hefyd yn datblygu polisi dwyieithog ar gyfer sefydliadau Addysg Bellach.

Yr amcan yw datblygu gallu disgyblion a myfyrwyr a sir i fod yn hyderus ddwyieithog er mwyn eu galluogi i fod yn aelodau cyflawn o'r gymdeithas ddwyieithog y maent yn rhan ohoni.

Dylai holl sefydliadau addysg y sir adlewyrchu ac atgyfnerthu'r polisi iaith yn eu gweinyddiad, eu bywyd cymdeithasol a'u trefn fugeiliol yn ogystal ac yn eu darpariaeth academaidd.